Lu filu d’erva

Si la carizza di lu Diu criaturi
si lu mantu di la sò carità.
Nasci 'nta la terra niura
e cummogghi tutti li pirtusi,
si bedda, fissiusa e orgugliusa;
crisci ritta, china di superbia
ti isi l'occhi finu a lu celu
pari ca ricissi: sugnu ccà.
T'annachi cu lu ventu mattuttinu
ti vesti di brillanti di rugiada
brillìi cu la stizza mattutina
si frisca comu l'acqua di surgenti.
Crisci ‘mmenzu li petri di muntagna
sutta li bordi di li marciaperi
‘mmenzu la munnizza, unn'è ‘gghiè.
Isu l'occhi, taliu lu criatu
e sempri a tia viu
filu d'erva criatu di Diu.
Chi fussi lu munnu senza di tia?
Fussi 'na petra, vacanti di tia,
fussi desertu chi gira 'ntunnu
senza sapiri mancu u picchì.
Tu vesti sta petra di milli culuri
si lu sustegnu di li ciura di pratu,
si la frischizza di l'omu criatu,
si lu cuscinu di l'omu di Diu,
fai ‘ùmmira a lu vermi di terra,
si l'alimentu di tutti l'armali.
Si tutta bedda, picchì d'accussì.
Diu ti fici p'arripusarisi l'occhi
‘Un disiari l'oduri di la rosa
picchì si senza spini;
‘un circari l'amuri di li ciuri di serra,
picchì ti cògghinu e mori.
Tu si bedda accussì,
nica ri rintra e di fora:
ringrazia lu Diu, ca ti fici accussì.
Si l'omu ti taliassi cu l'occhi di Diu
stassi accura unni metti li peri
e si pi svintura
pusassi lu so’ peri supra di tia
si calassi cu tuttu lu so’ iu
e agginucchiuni ti dicissi
pirdunu filu d'erva
pinsava sulu a mia.
E poi cu tutta la ducizza
ti mittissi arreri aggritta
e a lu ventu ci dicissi
ventu portaci rispettu
picchì stu filu d'erva
è priziusu pi mia.
E' lu disiu di l'arma mia
è tuttu l'amuri di Diu
siminatu supra la terra criata
è lu mantu di la sò carità.
Filu d'erva di milli culuri
ti ringraziu picchì si d'accussì.

Testo in lingua:Il filo d’erba//Sei la carezza del Dio creatore/sei il manto della sua carità./Nasci nella terra nera/e copri tutti i buchi,/sei bella, flessuosa e orgogliosa;/cresci dritta, piena di superbia/Sollevi gli occhi fino al cielo/sembra che dica: “Sono qua”./Ti dondoli con la brezza del mattino/ti vesti di brillanti di rugiada/brilli con la brina mattutina/sei fresca come l'acqua di sorgente./Cresci tra le pietre di montagna/sotto i bordi dei marciapiedi/Nell’immondizia, ovunque./Sollevo gli occhi, guardo il mondo creato/e sempre ti vedo/filo d'erba creato da Dio./Cosa sarebbe il mondo senza di te?/Sarebbe una pietra, senza te,/sarebbe deserto che gira in tondo/senza sapere neanche il perché./Tu vesti questa pietra di mille colori/sei il sostegno dei fiori di prato,/sei la freschezza dell'uomo creato,/sei il cuscino dell'uomo di Dio,/fai ombra al verme di terra,/sei l'alimento di tutti gli animali./Sei tutta bella, perché così./Dio ti fece per riposarsi gli occhi/non desiderare l'odore della rosa/perché sei senza spine;/non cercare l'amore dei fiori di serra,/perché ti colgono e muori./Tu sei bella così,/piccola di dentro e di fuori:/ringrazia Dio, che ti fece così./Sei l'uomo ti guardasse con gli occhi di Dio/starebbe accorto a dove mette i piedi/e se per sventura/posasse il suo piede sopra di te/si abbasserebbe con tutto il suo io/e in ginocchio ti direbbe/perdono filo d'erba/pensavo solo a me./E poi con tutta la dolcezza/ti metterebbe di nuovo dritta/e al vento direbbe/vento portaci rispetto/perché questo filo d'erba/è prezioso per me./E' il desiderio dell'anima mia/è tutto l'amore di Dio/seminato sopra la terra creata/è il manto della sua carità./Filo d'erba di mille colori/ti ringrazio perché sei così./